පෞද්ගලික වෛද්‍ය විද්‍යාල කාලයෙන් කාලයට ලංකාවේ උණුසුම ඉහළ නංවන මාතෘකාවකි.ඕනෑම දෙයක් කිරීමේදී ඒ හා බැඳී පවතින ගුණ අගුණ පවතියි. පුද්ගලික වෛද්‍ය විද්‍යාල පිළිබඳවද මෙම කරුණ සත්‍ය වේ.එහෙත් බොහෝවිට ප්‍රචාරණය පහසු වන බිම් මට්ටමේ පුද්ගලයන් සිටිනුයේ විරුද්ධ පැත්තේ නිසා බොහෝවිට සාමාන්‍ය ජනතාවට දැනගැනීමට ලැබෙන්නේ එහි නුගුණම පමණකි.

නජච්චා වසලෝ හෝතී නජච්චා හෝති බ්‍රාහ්මණෝ

කම්මනා වසලෝහෝතී කම්මනා හෝති බ්‍රාහ්මණෝ

යැයි බුදුරජාණන් වහන්සේ දේශනා කළහ. කරුණු කාරණා එසේ වුවද ලංකාවේත් ඉන්දියාවේත් කුල භේදය පදනම් කරගෙන මිනිසුන් පීඩාවට පත්කිරීම නම් තවමත් නැවතී නැති හැඩකි.රට පාළනය කළ පිරිස සිය කාර්‍රයේ ස්වභාවය අනුව ක්ෂත්‍රීය නම් වූහ. ඔවුනට උපදෙස් දෙමින් ආගම ඉගැන්වූවෝ බ්‍රාහ්මණ විය. වෙලඳාම් කළෝ සිය රැකියාව අනුව වෛශ්‍ය විය. ඊටත් පහළ අය චන්ඩාල, ක්ෂුද්‍ර ආදී ලෙස පුරාණ ඉන්දියාවේ මූලික මිනිස් අයිතියක් වත් නොමැතිව නරා දුක් වින්දහ.අද අපි උජාරුවෙන් කතා කරන ශ්‍රේෂ්ඨ ඉන්දියාවේ ව්‍යවස්ථාව සැකසීමට මූලිකව කටයුතු කළ මහාචාර්ය අම්බෙඩ්කාර් ගේ ජීවිත කතාව කියවීමෙන්ම කුල මතවාදය නිසා මිනිසුන් කොතරම් ශාරීරික සහ චිත්ත පීඩාවට පත්වේදැයි සිතා බලන්න. කොටින්ම එය මිනිස් ගුණධර්ම වලට නිගාවකි.

ලංකාවේ තත්වය මේ තරම්ම දරුණු නොවුවද කුල ගැටුම කොතරම්දැයි වටහාගැනීමට, මෙතරම් උතුම් හේතු ඵලවාදී දහමක් දෙසූ ශ්‍රේෂ්ඨ මනුෂ්‍යයකු වූ බුදුන්ගේ සාසනයම කුල අනුව බෙදාගෙන අපවිත්‍ර කරගෙන ඇති ආකාරය දෙස බැලීමෙන්ම වටහාගත හැක.ගොයිගම, කරාව, දුරාව, රොඩී, පේඩි, බෙරවා, හකුරු, තුප්පහි ආදී මෙකී නොකී නම් වලින් බෙදී ලාංකිකයෝ තවත් කෙනෙකුට වඩා තමා උස් පහත් කොට පෙන්වීමට යත්න දරති.වාසනාවකට මෙන් වත්මන් පරපුර ක්‍රමයෙන් මෙම නිහීන සිතුවිල රටාවෙන් ඉවතට ගමන් කරමින් සිටියි.මේවා මෙසේ වීමට යම් හේතුවක් තිබිය යුතුය.

ගොවිතැන් බත් කළ අය රැකියාව අනුව ගොයිගම වූහ, හකුරු සෑදූ අය හකුරු වූහ, බෙර ගැසූ අය බෙරවා වූහ. එනම් රැකියා ස්වභාවය අනුව ඔවුහු බෙදුනහ. ක්‍රමයෙන් කල් ගතවත්ම ඔවුහු එම බෙදීම, එනම් කුල අනුව වරප්‍රසාද භුක්ති විඳීමටත් ඇතැම් අන් පාර්ශවයන්ගේ වරප්‍රසාද සීමා කිරීමටත් පටන්ගත්හ. ක්‍රමානුකූලව එම ක්‍රමය සමාජය වෙලාගත් පිලිලයක් බවට පත් විය.එය මිනිස් සමාජයම පෙළන සාධකයක් බවට පත් විය. ඉන්දියාවේ නම් තත්වය තාමත් එසේමය.ඇතැම් පහත් යැයි සැළකෙන කුල වල අයට පිරිසිඳු වතුර පොදක් වත් නෑමට තහනම් ය.රැකියා අනුව බෙදීමත් තමන් කරන දේ කිරීමට තවත් පිරිසකට නොහැකියයි පූර්ව නිගමන වලට එලඹි, උගත් එහෙත් බුද්ධිමත් නොවූ මිනිස්කමට නිගා ගෙනදෙන පිරිසක් විසින් සමාජ ක්‍රමය පවත්වාගෙන යාමත් නිසා මිනිස් සංහතියට වූ විපතක තරම ඉහත දැක්වූ කරුණු වලින්ම අවබෝධ වනවා ඇත.

මෙතරම් අටුවා ටීකා ටිප්පණි කියන්නට සිදු වූයේ මේ අද හටගෙන ඇති ධර්මතාව හේතු ඵල සහිතව වෙනස් ස්වරූප වලින් මීට පෙරද හටගෙන ඇතිබව ඒත්තු ගැන්වීමටය.

ලංකාවේ පෞද්ගලික විශ්වවිද්‍යාල දැමීමට එරෙහි විය යුතු හේතු ලෙස දැක්වෙන්නේ මොනවාද? එකක් නම් එවිට මුදලට උපාධි ගන්නට හැකිවනු ඇති බවයි. එනම් එය වරප්‍රසාද ලත් පන්තියකට සීමා වන බවයි. ඇයි එතකොට පුද්ගලික වෛද්‍ය විද්‍යාල දැමීමට විතරක් එරෙහි වෙන්නෙ? එතකොට පුද්ගලික ඉංජිනේරු විද්‍යාල? පුද්ගලික තොරතුරු තාක්ෂණ ආයතන?පුද්ගලික කලා විශ්වවිද්‍යාල?පුද්ගලික නීති පීඨ?පුද්ගලික ගණකාධිකාරී ආයතන? මේකෙන් කරුණු කීපයක් පේනවා.එකක් තමා මේ විරුද්ධවන පිරිස හිතනවා වෛද්‍ය වෘත්තිය අනෙක් ඒවට වඩා ලොකු එකක් කියලා.ඒකනෙ මේ වෙන හැන්දකින් බෙදාගන්න ඉල්ලන්නෙ.කෝ එතකොට සමානාත්මතාවය?ඇයි ඉංජිනේරුවො, ගනකාධිකාරයෝ මහන්සි වෙලා නෙවෙයිද ඉගෙනගෙන තියෙන්නෙ?ඒගෙල්ලො මොළේ අඩු නිසා නෙවෙයි ඒ අංශ තෝරගෙන තියෙන්නෙ.එහෙනම් ඒ ගොල්ලො ඇයි කෑ ගහන්නෙ නැත්තෙ?

එතකොට තව සමහරු කියනවා අනිත් ඒවා වගේ නෙවෙයිලු වෛද්‍ය විද්‍යාව.මිනිස්සුන්ගේ ජීවිත එක්ක සෙල්ලම් කරන්න් බෑලු.අනේ ඉතිං මේ විද්‍යාව අපිට ලැබිල තියෙන්නෙ කොහෙන්ද? බටහිරින් නේද? අපි මේ කාත් එක්කද සැසඳෙන්න හදන්නේ? ඇමරිකාව, එංගලන්තෙ, ප්‍රංශෙ, ජර්මනිය, රුසියාව, ඔස්ට්‍රේලියාව, නවසීලන්තෙ, ජපානෙ වගෙ රටවල් එක්ක තමා නිතරම තරඟෙ.ඒ රටවල් වල ළදරු මරණ අනුපාතෙට කිට්ටුයිලු ලංකාවෙත් ගණං හිලවු.මාතෲ මරණ අනුපාතයත් ගොඩක් කිට්ටුලු. ජීවන අපේක්ෂාවත් එහෙමලු. ඒක නිසා ලංකාවේ වෛද්‍ය ක්ෂේත්‍රයත් අර රටවල වගේම දියුණුලු.අනේ හොඳයි.හොඳට බලන්න. මෙන්න සාක්කි. මේ කියපු ඔක්කොම රටවල් වල සියට 95ක්ම උපාධි දෙන්නෙ සල්ලි වලට.සමහර රට වල ඉස්කෝලෙ යන කාලෙ කලා විශය හදාරලා විශ්වවිද්‍යාලෙදි ඕනෙ නම් වෛද්‍යවිද්‍යාව හදාරන්න පුළුවන්. ඔස්ට්‍රේලියාව, නවසීලන්තෙ එහෙම මේකට උදාහරණ.එහෙනම් ඔය කියන විදියට ඒ රටවල් වල මිනිස්සු බල්ලො වගෙ තැන තැන බේත් වැරදිලා මැරිලා වැටෙන්න එපැයි.වෙන එකක් ඕනෙ නෑ. ඉන්දියාවම බලන්න.සල්ලි දීල නෙමෙයිද ඉගෙනගන්නෙ?අපේ මිනිස්සු ඔය බුරුතු පිටින් එහෙනම් යන්නෙ ඇපලෝ එකට බයිපාස් කරගන්න.කෝ හෝ ගාල මැරෙනවද?පේනව නේද? මේ ගොඩක් ඒවා අර අපි පුංචි කාලෙ ඉස්කෝලෙ යනකොට කරපු රූප බලා කතා ගොඩනගනව වගේ ඒවා.මිනිස්සු ඔලමොට්ටලයො වගේ හොයන්නෙ බලන්නෙ නැතුව මේව විශ්වාස කරන එක තමා වරද?

තව සාක්ෂි තියනවා.දැං මේ දක්ෂ විදියට ඉගන ගත්ත කියමු.ඊට පස්සෙ විශේෂඥයො වෙන්න කොහේද යන්නෙ?වැඩිපුරම ඇමරිකාවට, එංගලන්තයට හෝ ඔස්ට්‍රේලියාවට. එතකොට මේවට ගිහිල්ලා කාගෙන්ද වැඩිදුර තමන් නොදන්න ඒවා ඉගන ගෙන එන්නෙ?අර සල්ලි දීලා උපාධි ගත්ත සමහරවිට ඉස්කෝලෙ යන කාලෙ කලා විෂය හදාරපු සුද්දන්ගෙං.එතකොට මේ කිසි ප්‍රශ්ණයක් නැද්ද?හම සුදු වුනාම මම හිතන්නෙ ඔක්කොම විසඳෙනව ඇති.ලංකාවෙදි එක ප්‍රතිපත්තියක්, පිට රටදි ඒ අයම තව විධියක්.ඉවසන්නම බැරි සම්පූර්ණ කතාවම මිනිස්සුන්ට කියන්නෙ නැතුව තමන්ට වාසි කෑලි කෑලි කියල ජනතාව, නොමග යවන්න පුළුවන් තරම් ගොන්නු කියල හිතන් ඉන්න බොරදියේ මාළු බාන තක්කඩියන්ව තමා.මට තේරිලා තියන විදියටනම් ලංකාවෙ මිනිස්සු එච්චර මෝඩ නෑ.ප්‍රශ්නෙ බහුතරයක් සම්පූර්ණ කතාවම දන්නෙ නැති එකයි.

හරි පුද්ගලික වෛද්‍ය විද්‍යාල දැම්මේ නෑ කියමු. ඒත් බලන්න මිනිස්සුන්ගෙ කැත ගති. හැබැයි දොස්තරලා අතරත් සැබෑ මහත්මා ගුණ තියන දෙවිවරු ඉන්න බව අපි මතක තියාගන්න ඕනෙ. මේ කියන්නෙ ඒ ගොල්ලො ගැන නෙවෙයි. බහුතර අවස්ථාවාදියො ගැන.කොළඹ වෛද්‍ය පීඨයේ ගොඩාක් අය හිතන් ඉන්නෙ ඒගොල්ලො තමා මාරම කට්ටිය කියලා.මොකද ඒ ගොල්ලො තමා වැඩිම ලකුණු අරන් තියෙන්නෙ.ඒගොල්ලන්ගේ කෝස් එකත් අමාරුලු.ඒක නිසා ලකුණු ගන්නත් අමාරුලු.ජයවර්ධනපුර යන්න ඊට වඩා ලේසිලු.ඒගොල්ලන්ට ලකුණු ගන්නත් ලේසිලු.ඒක නිසා දුර පළාත් වලට පත්වීම් ලැබෙන්නෙත් නෑලු.රුහුණෙ, රජරට අය ගැන කතාකරන්නෙවත් නෑ.ලැජ්ජ නැතිකම මහමුදලිකමටත් වඩා ලොකුයිලුනෙ.බලු වලිගෙ ඉතිං උණපුරුකෙ දාල තිබ්බත් කෙලිං වෙන්නෙ නෑනෙ.දොස්තර වෙන්න ගියත් ඉතිං කැත ගති අරින්න බෑ.පුද්ගලික වෛද්‍ය විද්‍යාල නොදැම්මත් මේ ගොල්ලන්ගේ බෙදිල්ල මේ කපේදි අරින්න බෑ.එකම විදියට තේරිලා ආපු අය අතරත් උහතෝකෝටික ප්‍රශ්න.බලමින් ලකුණු ගත ශිල්ප නොදෙමැයි කීවෙන් මහසත කියලා ගුත්තිලේ කවියක් තියෙන්නෙ.මේ කෑගහන වැඩි දෙනා දිහා බැලුවමත් මේක පේනවා.

මේ අහංකාරකම් වලට එක මූලික හේතුවක් තමා තමන්ගේ කොට්ඨාශය හැර අනෙක් අය පට්ටපල් මෝඩයෝ කියල හිතං ඉන්න එක. දොස්තර මහත්තයගෙන් නිකන් දීපු බේත් ගැන විස්තරයක් අහලා බලන්න. යක්කු වගේ ඇඟට කඩා පනිනව.බේත් ගන්න ගියාම දාස් ගණං කඩනවා.කියන ලෙඩේ අහන් ඉන්නෙත් නෑ.ලෙඩේ අහවල් එකද දන්නෙ නෑ කියලා බැරිවෙලාවත් කියවුනොත් 'කවුද දොස්තර? තමුසෙද? මමද?' කියලා අහනවා.රිපෝර්ට් එකක් පෙන්නන්න ගියාම ගෙවල නෙවෙයි නම් ගියේ පුදුම නුරුස්සන විදියට හැසිරෙන්නෙ.හරියට එයා නිවාඩු පාඩුවේ ඉන්නකොට අපි කරදර කරන්න ඇවිල්ල වගේ.එක ලෙඩෙක්ව විනාඩි 2ක්වත් බලන්නෙ නෑ.බැරි වෙලාවත් ලෙඩෙක් වැරදිලාවත් මළොත් බලන්න ඕනෙ තමන්ගෙ තමන්ගෙ අයව බේරගන්න දොස්තර මාෆියාව ක්‍රියාත්මකවෙන හැටි.මේ වගේ අඳබාල විදියට හැසිරෙන්නද මේගොල්ලන්ට මේ උගන්නන්නෙ.මෙහෙම හරක් හදපු එකට මුන්ට ඉගනගන්න ආදායම්බදු ගෙවපු අපිටයි තලන්න ඕනෙ.කරුණාකරලා දෙවිවරු වගේ දොස්තර මහත්තුරු මේකෙන් හිත් අමනාප කරගන්න එපා.ඒත් අපිට වඩා හොඳට ඔගොල්ලො දන්නවා ඇතිනෙ යාලුවන්ගේ හැටි. නේද?

ලංකාවේ දොස්තරලා ඉන්නේ 13000ක් විතරලු. 44000ක් විතර ඕනෙලු.මෙචචර ගානක් හදන්න අපිට බදු ගෙවන්න සිද්ධවුනොත් එහෙම අපේ මුළු පඩියම දෙන්න වෙයි.දොස්තරලත් කැමති නෑ කට්ටිය වැඩි වෙනවට. එතකොට ගරන්න බෑනෙ.ලෙඩ්ඩු බෙදිලා යනවා.ඉතිං මේගොල්ලො දොස්තරලා වැඩි කරනවට එරෙහිව රටේ ලෝකෙ නැති හේතු කියනවා.ලංකාවේ රජයේ විශ්වවිද්‍යාල වලට තෝරන්නෙ කෝටා ක්‍රමයට.ඒ 2යි බී 1ක් ගත්ත කොළඹ ළමයා ගෙදර ඉන්දැද්දි බී 2යි සී 1ක් ගත්ත ඈත ළමයෙක් වෛද්‍ය විද්‍යාලෙට ඇවිල්ලා පාස් වෙනවා. මේකෙන්ම තේරෙනව නේද දොස්තර වෙන්න නිකං අමුතුම පොරක් වෙන්න ඔන්නෙ නෑ කියලා. කැපවීම සහ උත්සාහය තියන කෙනෙක් ඒ ප්‍රවාහයට අහු වුනාම අන්තිමේදී ඕන කරන තැනට යනවා. ඒ ක්‍රමයේ වරදක් නෑ.ඒත් අපි ඇයි ඒකට බදු ගෙවන්නෙ?අපි හිතනව අර දුර බැහැර ළමයට සාධාරණයක් කරන්න. ඇයි එයාට සම්පත් අඩුවෙන් තිබිලනෙ එයා පාස් වුනේ.ඒත් එතනදි අර කොළඹ ළමයට ලොකු අසාධාරනයක් වෙනවා. ඒත් අපේ මානුෂික හැඟීම් නිසා අපි අර ගමේ ළමයට වැඩි අවස්ථාවක් දෙනවා.එතකොට ඒ ළමයා මොකද කරන්නේ?මිනිහා දොස්තර වෙලා, රටත් ගිහිල්ලා තවත් ඉගනගෙන, කසාදයක් එහෙම බැඳලා, හොඳ වාහනයක් අරන්, ලොකු ගෙයක් එහෙම හදලා, ළමයිවත් කොළඹ ලොකු ඉස්කෝල වලට දාලා, පුද්ගලිකවත් බේත් දීලා හොඳට ඉන්නවා.අපි ඒකටද කෝටා දැම්මේ.එතකොට අපි බදු ගෙවුවෙ ගමට ලැබෙන්න ඕනෙ දොස්තර මහත්තයව කොළඹ තියන්නද?සමහරවිට ඒ ගොල්ලෝ හිතනව ඇති අපිට මේවා තෙරෙන්නේ නෑ කියලා.සමහරු හිතන් ඉන්නේ නිදහස් අධ්‍යාපනේ නිකං ලැබෙනවා කියලා. ඒ ගොල්ලො හිතන් ඉන්නේ ඒක ඒගොල්ලන්ගේ අයිතිවාසි කමක් කියලා.හරියට නිකං අපි බදු ගෙවන්නෙ නෑ වගේ.යුතුකම්ගැන එහෙම හිතන්නෙම නෑ.

මම දන්න ෆාර්මසියුටිකල් බඩු විකුණන කෙනෙක් ඉන්නවා. හැම අවුරුද්ද අන්තිමේම ඒ ගොල්ලෝ ඒ ගොල්ලන්ගේ බේත් වෙළඳ නාමයෙන් විකුණන්න උදවු දෙන දොස්තරලගේ පවුල් පිටින් රට සවාරි එක්ක යනවා. ඒක තමා අල්ලස.නෝනා කියනවා ඇති ඔයා තව වැඩියෙන් ඒ බේතම ලියන්න කියලා.ඒ තියා සමහර දොස්තරලා ගෙවල් මාරු කරනකොට අර සේල්ස් රෙප්ට කතා කරලා කියනවා 'සනා බඩු ටික ඇදලා දෙන්න පුළුවන්ද?' කියලා.ලැජ්ජයි. අපි මහන්සිවෙලා වැඩකරලා බදු ගෙවන්නේ ඔය කියන විදියට මෙච්චරකල් තෝරගත්ත මිනිස්සුන්ට මේ වගේ කැතවැඩ කරන්න උගන්නන්නද?දොස්තරලගෙ හිතේ මේවා සාමාන්‍ය මිනිස්සු දන්නෙ නෑ කියලා. වැරදියි. මිනිස්සු මේවා දන්නවා.කපන්න බැරි අත ඉඹිනවා ඇර වෙන මොනවා කරන්නද? ඉන්නේ ඔක්කොම ආණ්ඩුවේ කට්ටිය විතරනෙ.මේ වරප්‍රසාද සහ පුහු මාන්නය නැති වෙනවට තමා මේගොල්ලො භය.රජයේ වෛද්‍ය පීඨ වල ඔය කියන බුද්ධිමත් යැයි තෝරගත්ත අයට මේවද කියලා දෙන්නේ.අපිට කොලේ වහල වස ලියලා තියන පිච්චියටත් කෙළවන හැටි තමා කියලා දීලා තියෙන්නේ.කූඩැල්ලො මෙට්ටෙ තියන්න වියදම් කරන අසරණ බදු ගෙවන ජනතාව.මේගොල්ලන්ගේ කතාව නම් හැබැයි මේගොල්ලෝ ඔක්කෝම තනියෙන් කරගෙන අපි ගැන උපන් පහන් සංවේගයෙන් නිකාං බේත් කරනව වගේ.අපිනේ දන්නේ ගෑස්.

සමහර රටවල නීතිය අනුව දොස්තරලා එක රෝගියකු වෙනුවෙන් නිශ්චිත කාලයක් අනිවාර් යයෙන්ම වැය කළ යුතුයි.මෙහෙ වගේ හරක් බලනවා වගේ බේත් දෙන්න බෑ.ඊට අමතරව ලෙඩාට දීපු බෙහෙත් ගැන ඔහුව හෝ ඇයව අනිවාර් යයෙන්ම දැනුවත් කළ යුතුයි.පුදුමෙ නම් රට ගියාම අපේ අය මේ ඔක්කොම කරනවා.ඒත් මෙහෙ ආවම අමුතු කලාවක්.ලෝකෙට පරකාසේ ගෙදරට මරගාතේ කියලත් කතාවක් තියනවනෙ.

ලංකාවේ දොස්තරලත් බලන්නේ අමුතු ගැට්ටක් ගහගෙන වරප්‍රසාද බලෙන් භුක්ති විඳින්න.පිටරටවල ඔක්කොම ක්ෂේත්‍ර සළකන්නෙ සමතැන් වල දාලා.මෙහෙ අයට ඉතරක් අමුතු ගායක්. මිනිස්සු දොස්තරලට දෙයියෝ වගේ සළකනවා නම් ඒක ඉබේ ලැබිය යුතුයි මිසක් බලෙන් ඉල්ලගන්න බෑ.කොහොමත් දැන් ගොඩාක් දොස්තරලා දෙකයි පණහේ වැඩ කරලා තත්වය බාල්දු කරගෙන තියෙන්නේ.ලෙඩ්ඩු ඇපේට තියලා වර්ජන කරලා දැන් ඒගොල්ලොත් බස් කාරයෝ ගාණට වැටිලා තියෙන්නෙ. තවටික කාලෙකින් මිනිස්සු දොස්තරලට ගහන්නත් පටන් ගනියි.දොස්තරලා ඒ වගේ අභාග්‍ය සම්පන්න තත්වයකට නොවැටෙන විදියට ගෞරවාන්විතව මිනිස්සු මෝඩයෝ කියලා හිතාගෙන කඩේ නොයවා ඉන්නවානම් තමා හොඳ.

මටනම් හිතෙන්නේ ලංකාවේ මිනිස්සු මේක ගැන මීට වඩා දැනුවත් වෙන්න ඕනෙ.මේ ඉතිං තොරතුරු යුගයනෙ.එතකොට අපිට ඇත්ත ඇති සැටියෙන් පෙනෙයි.යූ. එන්. පී. කාරයා කතා කරනකොට අපිට හිතෙනවා එයා තමා ඇත්ත කියන්නෙ කියලා.ශ්‍රී ලංකා කාරය කතා කරනකොටත් අපිට එහෙමම හිතෙනවා. ඒත් ඒ දෙන්නගේ කතාවේ එකතුව තාර බර ඇරලා ගත්හම තමා ඇත්ත කතාව ලැබෙන්නේ. හරියට සිරස නිවුස් සහ රූපවාහිනී නිවුස් වගේ. සිරස බැලුවම ලංකාව හරියට උගන්ඩාව වගේ.රූපවාහිනිය බැලුවම ලංකාව හරියට ස්විට්සර්ලන්තෙ වගේ.ඒ වුනාට ලංකාව ලංකාව වගේ කියලා අපි දන්නවනේ.ඒ නිසා අපේ අතේ තමා ඔක්කොම තියෙන්නෙ.අපි මැදහත්ව හොයල බලලා එක එක්කෙනාට අහු නොවී ඉන්න ඕනෙ මාතෘකාවක් මේක.බුදු හාමුදුරුවොත් කියලා තියනවනේ මධ්‍යම ප්‍රතිපදාව තමා හොඳම කියලා.